الاستفتاء

الاستفتاء يوم الاتنين: يعنى قدامك حل من اتنين:

يا لييك صوت يا مليكشى أصلا بطاقة انتخاب

لو لييك صوت قدامك حل من اتنين:

يا تصوت (بلطم أو بدون) يا متصوتشى

لو صوت قدامك حل من اتنين:

يا تكون فاهم الناس دى بتتكلم عن اييه (أقلية مووووووت) يا متكونشى عارف يعنى اييه دستور أصلا (هو يعنى اييه دَستور يا با الحاج!!!!)

لو كنت فاهم قدامك حل من اتنين:

يا ترفض التعديل يا "تعترض " عليه

أما لو مش فاهم فقدامك حل من اتنين:

يا هيخلوك توافق يا اما انتا هتوافق لوحدك (هبل ذاتى!!!)

أما لو ملكشى صوت أو مروحتش تصوت من باب اليأس فقدامك حل من اتنين:

يا تنزل يومها الشارع يا تقعد زى خيبيتها فى البيت

لو قعدت قدامك حل من اتنين:

يا تشوف النتيجة الغم يا تروح تنام

لو نزلت قدامك حل من اتنين:

يا تتظاهر و يتقبض عليك يا اما تعدى على اللجان تتفرج و تراقب (رقابة شعبية, أقل ما يمكن!!)

لو راقبت يا هتشوف مسخرة من الناس يا اما من الحكومة و فى الحالتين هتتفقع و ترجع تنام

فى النهاية قدامك حل من اتنين:

يا الدستور هيعدى يا الدستور هيتوافق علييه!!

أما انت ف اييه اللى دخلك فللى ملكشى فييه أصلا يا حشرى, رووح شوفلك حاجة مفيدة تعملها!!!!!!!!!!!