Tuesday, September 13, 2005

زى ما يوم علمت القلب ازاى يهواك
و انت بتمشى علم قلبى ازاى ينساك
انا مش حمل عذاب تانى

Saturday, September 10, 2005

الحمار الى هو انا

كتبت من ييجى 6 اشهر ابيات شعر تريقة ملقاة على لسان حمار و ساعتها دار حوار بينى و بين اصحابي على موضوع ان الحمار احسن من الانسان الى زي الحمار!!!!

المهم رسينا و قلتلهم ان ودانى بدأت تتطول فعلا و ان ده وباء انتشر فى مصر و على اوائل شهر 9 كل الناس هتكون حمير

الحمد لله توقعى طلع فى محله... الانتخابات مشيت نزيهة لان الحكومة م كانتش محتاجة تزورها اصلا مدام فى حمير بالعدد الكافى سهل ترهبه بطرقعة كرباج وهمى و بكلب عجوز صوته عالى بس من غير انياب

فوق كل ده... فيه حمير صدقت بجد!!!
كلام من نوعية "لا احد يصلح" و "الاخرين وعودهم كاذبة" و "اللى نعرفه احسن من اللى منعرفوش" و غيره و غيره من الدعايه اللى حتى الحمير مش ممكن تصدقها!!

عموما ادامنا الان فرصة كويسة... كل واحد يقوم الصبح و يبص ف المرايه و يقول "انا حمار"!!!
ولا اقولكم! الحمير مالهاش ذنب نهزئها معانا.... تفوا على نفسكوا احسن!!!

Monday, September 05, 2005

مصر تنتخب

هى مصر تنتخب و لا مصر تنتحب؟؟
!!
يلا مش مهم
!!!!
من الان لن اشاهد اى كلام عن مصر الحاضر و يكفينى حرقة دم مصر الماضى من كتب التاريخ
سلام و اشوفكم بعد يوم 9

Sunday, September 04, 2005

لجنة انتخابات الرئاسة


اليوم رفضت اللجنة قبول حكم القضاء و بغض النظر عن طبيعة الحكم فهذه اللجنة مستقلة تماما و غير مسؤولة امام احد الا الله و لا يمكن الطعن فى قراراتها

نعم!!!! اشمعنا يعنى!! البهوات معصومين؟؟ و بعدين ايه موضوع الشخصيات العامة الى فيها دى!!!

هذا و قد قبل الشعب المصرى و القضاه الامتثال لقرارات هذه اللجنة على ان يكون تشكيلها المعدل كالاتى:

ان تشتمل على عضوية 5 من القضاة المبشرين بالجنة

ان تضم اللجنة بين صفوفها اثنين من الانبياء أحدهم على الاقل يحمل كتاب سماوى

ان تضم بين اعضائها اله واحد على الاقل على ان يحتسب صوته ب صوتين فى اى تصويت للجنة


شكرا للقضاء المصرى على موقفه المشرف فى الوقوف الى جانب عدالة السماء للاقتصاص من هذا الشعب الظالم

سلام